“Jewel Thief – The Heist Begins” movie teaser ka review kuch aisa hai—isme diamond chori ka concept dikhaya gaya hai, jo pehle bhi kaafi movies me dekhne ko mila hai, jaise Hrithik Roshan ki Dhoom ya kai Hollywood films. Toh isme naya kya hoga, ye dekhna interesting hoga.
Hello guys, welcome to my channel Oh Reallyy! Main hoon Muskan, aur aaj baat karenge ek upcoming movie ke baare mein jo kaafi bade actors ke saath aa rahi hai.
1967 me Dev Anand sahab ki Jewel Thief release hui thi, jo ek major hit thi. Uska ek song “Hothon Pe Aisi Baat” aaj bhi iconic hai. Ab usi theme aur naam ke saath ye nayi movie Jewel Thief – The Heist Begins aa rahi hai. Aajkal heist-based movies aur shows kaafi popular ho rahe hain, jaise Money Heist, toh lagta hai log isi trend ko follow kar rahe hain.
Iske teaser me Jaideep Ahlawat ek naye stylish look me dikh rahe hain, jo pehle unke desi ya serious roles se kaafi different hai. Paatal Lok aur Jaane Jaan me unka look bilkul alag tha, par yaha pe ek stylish don ya thief ke role me nazar aa rahe hain. Surprisingly, unka look Saif Ali Khan se zyada impactful lag raha hai! Saif bhi stylish avatars ke liye jane jate hain—jaise Race aur Sacred Games—lekin isbaar Jaideep unhe overpower kar rahe hain looks aur performance dono me.
Female lead Nikita Dutta nazar aa rahi hain, jo pehle Kabir Singh me chhota role kar chuki hain. Par teaser se lag raha hai ki yaha unka proper lead role hoga. Saath hi Kunal Kapoor bhi hai, jo Rang De Basanti aur Luv Shuv Tey Chicken Khurana se popular huye the. Kaafi time baad ek prominent role me dikh rahe hain, toh dekhna hoga ki ye comeback unke liye kaise kaam karta hai.
Teaser overall decent laga, but concept bahut repetitive hai. Diamond chori ka theme already kaafi baar explore ho chuka hai, toh kuch naya hoga ya nahi, ye movie dekhne ke baad hi pata chalega. Accha hai ki ye OTT pe aa rahi hai, kyunki theaters me aajkal movies utni nahi chal rahi. Hope so ye movie actors ke liye ek strong project ban sake!